اسفه الى كل من اسمه احمد

من طرف **reem0s eldi@bya** الأحد سبتمبر 07, 2008 11:38 am

المؤذن يقيم الصلاة

الامام يقول

إستقيموا .... واعتدلوا ..... وإخشعوا ......ساووا الصف فإن تسوية الصف من تمام الصلاة

الله أكبر أحمد ركز بقا فى الصلاة وبلاش تسرح طيب أهو حاضر .... أممممممم الله لون الجدران بتاعت المسجد دى جميلة قوى الله بقي لو عملتها فى اوضتى لا وكمان ايه عملت حيطة وحيطة ما هى دى الموضة هتبقي تحفة

أحمد ركز يا أحمد , طيب ما أنا مركز أهو إيه ده هو الراجل الى جنبى ده صوابع رجليه كبيرة كدة ليه ؟؟صح بمناسبة الصوابع هى إيه صوابع زينب دى ؟بيتهيألى دى الى عاملة زى الزلابيا !!!
زلابيا ايه وصوابع ايه ركز يا أحمد

سمع الله لمن حمده

ياعم متخافش أنا مركز طيب انت قريت سورة ايه ؟ الفيل يا عم ... علشان تعرف إنى مركز لا ياسيدى انت قريت العصر ركز بقا شوية

هو المغرب باقى عليه قد ايه هو مال النهار بيطول ليه كدة الواحد جعان جداً اه صح ان شاء الله بكرة أجرب أفطر فى المطعم الجديد الى الواد ميزو قالى عليه بيقولوا عليه أكله ايه حكاية

ميزووووووووو ايه ده انا امبارح نسيت الساعة بتاعتى معاه الى عمو جايبهالى من ايطاليا وهو راجع اول لما اخلص هاتصل عليه يجيبها اصل يقلب عليها انا عارفه

يا أحمد ركز يا أحمد طيب انا اهو أنظر لمكان السجود وأخلى بالى من الامام بيقول ايه

الله أما السجادة دى تحفة شكلها رقيق ومش متعب للعين ياترى ده سجاد والا موكيت

اه بمناسبة السجاد عاوز اطلع انضف السجادة الى فى اوضتى بقالها كتييييييييير ماتنضفتش
سمع الله لمن حمده

أعوذ بالله الشيطان ده بيخلى الواحد يسرح فى الصلاة هو مش فى رمضان الشياطين بتكون متسلسلة ثلاثين يوم وإلا تسعة وعشرين هو رمضان السنة دى كام يوم وبدأ امتى ؟ استنى كدة امممممم هو بدأ فى السعودية السبت وعندنا الاحد غريبه قوى الحكاية دى !!!!

هى الساعة تجيلها كام دلوقتى عدت خامسة والا لسه اليوم بيطول والا ايه جعااااااااااااااان

يا رب ماما تفتكر تعملى العصير بتاعى على الفطار انهاردة الواحد بيبقي همدان من الحر وعاوز حاجة تغذيه

هو احنا فى الركعة الكام ؟ يعنى هانقوم وإلا نقرأ التشهد ؟ طيب أنا أتأخر شوية أشوف الراجل الى جنبى ده هيعمل إيه هيقوم يقف وإلا يقرأ التشهد

شوفت دى الركعة التانية علشان سعادتك عمال تسرح ....طيب خلاص خلاص بجد هاركز

إيه الراجل الغريب الى جنبى الى يكل شوية يزق فى رجلى ده لما أبعد عنه شوية يمكن يبطل يوووووه برضه أستغفر الله العظيم

إيه صوت الموبيل ده الناس دى مش بتقفل الموبيل بتاعها ليه وهى داخلة ده مكتو ب على الحيطة بره لوحة كبييييييرة برجاء غلق التليفون قبل دخولك المسجد
بس بجد رنه جميلة يا ترى دى بتاعت مين عمرو صح؟؟ لالا عمرو إيه دى آخر اغنية لشعبان عبد الرحيم صح برافو عليك يا أحمد
الواحد عاوز يغير نغمة الموبيل

السلام عليكم ورحمة الله وبركاته

........

السلام عليكم ورحمة الله وبركاته

إيه ده الصلاة خلصت طيب؟؟؟

السلام عليكم ورحمة الله وبركاته

السلام عليكم ورحمة الله وبركاته

ياترى فينا كام أحمد سؤال عاوز اجابة ؟